นิมิตฺเต จตุโร ทิสฺวา, อสฺสยาเนน นิกฺขมิํ;

ฉพฺพสฺสํ ปธานจารํ, อจริํ ทุกฺกรํ อหํฯ

[17]

พาราณสิยํ อิสิปตเน, จกฺกํ ปวตฺติตํ มยา;

อหํ โคตมสมฺพุทฺโธ, สรณํ สพฺพปาณินํฯ

[18]

โกลิโต อุปติสฺโส จ, ทฺเว ภิกฺขู อคฺคสาวกา;

อานนฺโท นามุปฏฺฐาโก, สนฺติกาวจโร มม;

เขมา อุปฺปลวณฺณา จ, ภิกฺขุนี อคฺคสาวิกาฯ

[19]

จิตฺโต หตฺถาฬวโก จ, อคฺคุปฏฺฐากุปาสกา;

นนฺทมาตา จ อุตฺตรา, อคฺคุปฏฺฐิกุปาสิกาฯ

[20]

อหํ อสฺสตฺถมูลมฺหิ, ปตฺโต สมฺโพธิมุตฺตมํ;

พฺยามปฺปภา สทา มยฺหํ, โสฬสหตฺถมุคฺคตาฯ

[21]

อปฺปํ วสฺสสตํ อายุ, อิทาเนตรหิ วิชฺชติ;

ตาวตา ติฏฺฐมาโนหํ, ตาเรมิ ชนตํ พหุํฯ

[22]

ฐปยิตฺวาน ธมฺมุกฺกํ, ปจฺฉิมํ ชนโพธนํ;

อหมฺปิ นจิรสฺเสว, สทฺธิํ สาวกสงฺฆโต;

อิเธว ปรินิพฺพิสฺสํ, อคฺคี วาหารสงฺขยาฯ

[23]

ตานิ จ อตุลเตชานิ, อิมานิ จ ทสพลานิ [ยสพลานิ (อฏฺฐ.)];

อยญฺจ คุณธารโณ เทโห, ทฺวตฺติํสวรลกฺขณวิจิตฺโตฯ

[24]

ทส ทิสา ปภาเสตฺวา, สตรํสีว ฉปฺปภา;

สพฺพํ ตมนฺตรหิสฺสนฺติ, นนุ ริตฺตา สพฺพสงฺขาราติฯ

โคตมสฺส ภควโต วํโส ปญฺจวีสติโมฯ

28. พุทฺธปกิณฺณกกณฺฑํ

[1]

อปริเมยฺยิโต กปฺเป, จตุโร อาสุํ วินายกา;

ตณฺหงฺกโร เมธงฺกโร, อโถปิ สรณงฺกโร;

ทีปงฺกโร จ สมฺพุทฺโธ, เอกกปฺปมฺหิ เต ชินาฯ

[2]

ทีปงฺกรสฺส อปเรน, โกณฺฑญฺโญ นาม นายโก;

เอโกว เอกกปฺปมฺหิ, ตาเรสิ ชนตํ พหุํฯ

[3]

ทีปงฺกรสฺส ภควโต, โกณฺฑญฺญสฺส จ สตฺถุโน;

เอเตสํ อนฺตรา กปฺปา, คณนาโต อสงฺขิยาฯ

[4]

โกณฺฑญฺญสฺส อปเรน, มงฺคโล นาม นายโก;

เตสมฺปิ อนฺตรา กปฺปา, คณนาโต อสงฺขิยาฯ

[5]

มงฺคโล จ สุมโน จ, เรวโต โสภิโต มุนิ;

เตปิ พุทฺธา เอกกปฺเป, จกฺขุมนฺโต ปภงฺกราฯ

[6]

โสภิตสฺส อปเรน, อโนมทสฺสี มหายโส;

เตสมฺปิ อนฺตรา กปฺปา, คณนาโต อสงฺขิยาฯ

[7]

อโนมทสฺสี ปทุโม, นารโท จาปิ นายโก;

เตปิ พุทฺธา เอกกปฺเป, ตมนฺตการกา มุนีฯ

[8]

นารทสฺส อปเรน, ปทุมุตฺตโร นาม นายโก;

เอกกปฺปมฺหิ อุปฺปนฺโน, ตาเรสิ ชนตํ พหุํฯ

[9]

นารทสฺส ภควโต, ปทุมุตฺตรสฺส สตฺถุโน;

เตสมฺปิ อนฺตรา กปฺปา, คณนาโต อสงฺขิยาฯ

[10]

กปฺปสตสหสฺสมฺหิ , เอโก อาสิ มหามุนิ;

ปทุมุตฺตโร โลกวิทู, อาหุตีนํ ปฏิคฺคโหฯ

[11]

ติํสกปฺปสหสฺสมฺหิ, ทุเว อาสุํ วินายกา [อาสิํสุ นายกา (สฺยา. ก.)];

สุเมโธ จ สุชาโต จ, โอรโต ปทุมุตฺตราฯ

[12]

อฏฺฐารเส กปฺปสเต, ตโย อาสุํ วินายกา [อาสิํสุ นายกา (สฺยา. ก.)];

ปิยทสฺสี อตฺถทสฺสี, ธมฺมทสฺสี จ นายกาฯ

[13]

โอรโต จ สุชาตสฺส, สมฺพุทฺธา ทฺวิปทุตฺตมา;

เอกกปฺปมฺหิ เต พุทฺธา, โลเก อปฺปฏิปุคฺคลาฯ

[14]

จตุนฺนวุติโต กปฺเป, เอโก อาสิ มหามุนิ;

สิทฺธตฺโถ โส โลกวิทู, สลฺลกตฺโต อนุตฺตโรฯ

[15]

ทฺเวนวุเต อิโต กปฺเป, ทุเว อาสุํ วินายกา;

ติสฺโส ผุสฺโส จ สมฺพุทฺธา, อสมา อปฺปฏิปุคฺคลาฯ

[16]

เอกนวุติโต กปฺเป, วิปสฺสี นาม นายโก;

โสปิ พุทฺโธ การุณิโก, สตฺเต โมเจสิ พนฺธนาฯ

[17]

เอกติํเส อิโต กปฺเป, ทุเว อาสุํ วินายกา;

สิขี จ เวสฺสภู เจว, อสมา อปฺปฏิปุคฺคลาฯ

[18]

อิมมฺหิ ภทฺทเก กปฺเป, ตโย อาสุํ วินายกา;

กกุสนฺโธ โกณาคมโน, กสฺสโป จาปิ นายโกฯ

[19]

อหเมตรหิ สมฺพุทฺโธ, เมตฺเตยฺโย จาปิ เหสฺสติ;

เอเตปิเม ปญฺจ พุทฺธา, ธีรา โลกานุกมฺปกาฯ

[20]

เอเตสํ ธมฺมราชูนํ, อญฺเญสํเนกโกฏินํ;

อาจิกฺขิตฺวาน ตํ มคฺคํ, นิพฺพุตา เต สสาวกาติฯ

พุทฺธปกิณฺณกกณฺฑํ นิฏฺฐิตํฯ

29. ธาตุภาชนียกถา

[1]

มหาโคตโม ชินวโร, กุสินารมฺหิ นิพฺพุโต;

ธาตุวิตฺถาริกํ อาสิ, เตสุ เตสุ ปเทสโตฯ

[2]

เอโก อชาตสตฺตุสฺส, เอโก เวสาลิยา ปุเร;

เอโก กปิลวตฺถุสฺมิํ, เอโก จ อลฺลกปฺปเกฯ

[3]

เอโก จ รามคามมฺหิ, เอโก จ เวฐทีปเก;

เอโก ปาเวยฺยเก มลฺเล, เอโก จ โกสินารเกฯ

[4]

กุมฺภสฺส ถูปํ กาเรสิ, พฺราหฺมโณ โทณสวฺหโย;

องฺคารถูปํ กาเรสุํ, โมริยา ตุฏฺฐมานสาฯ

[5]

อฏฺฐ สารีริกา ถูปา, นวโม กุมฺภเจติโย;

องฺคารถูโป ทสโม, ตทาเยว ปติฏฺฐิโตฯ

[6]

อุณฺหีสํ จตสฺโส ทาฐา, อกฺขกา ทฺเว จ ธาตุโย;

อสมฺภินฺนา อิมา สตฺต, เสสา ภินฺนาว ธาตุโยฯ

[7]